НАСАН ТУРШИЙН БОЛОВСРОЛ VS НАСАН ТУРШДАА СУРАЛЦАХУЙН ТАЛААРХ

Баримт бичгийн шинжилгээний үр дүн

Abstract

Насан туршийн боловсрол, насан туршдаа суралцахуй хэмээх ухагдахууны агуулж буй утга санааны ялгаатай байдлыг тогтоох зорилгоор ЮНЕСКО, ЭЗХАХБ-аас гаргасан бодлогын баримт бичгийг сонгон судалсан үр дүнг энэхүү өгүүллээр танилцуулж байна. Манай улсын хувьд одоогоор аль нэр томьёог хэрэглэх талаар тодорхой судалгаа хийгдээгүй байна. Тиймээс “насан туршийн боловсрол”, “насан туршдаа суралцахуй” хэмээх энэхүү хоёр нэр томьёог хоёуланг нь хэрэглэж байна. Шинжилгээг насан туршийн боловсрол болон насан туршдаа суралцахуй хэмээх хоёр нэр томьёог тодорхойлж, хэрэглэж буй шалтгаан, хөгжлийн явцад хэрэглэгдэж ирсэн утгыг тодруулах нь цаашид бодлого эрх зүйн баримт бичигт нэгдсэн ойлголттой болоход дэмжлэг үзүүлнэ гэж үзсэн болно.

ЮНЕСКО, ЭЗХАХБ тодорхойлж, хэрэглэж буй байр суурийг тодруулах нь глобал хандлагыг харах боломжийг олгоно гэж үзэн 1) НҮБ-ын Боловсрол, соёл, шинжлэх ухааны байгууллага (цаашид ЮНЕСКО гэнэ), 2) Эдийн засгийн хамтын ажиллагаа, хөгжлийн байгууллага ( ЭЗХАХБ) 3) төлөөлөх томоохон эрдэмтдийн байр сууринд голчлон анхаарсан. Эдгээр байгууллага, төлөөлөх эрдэмтдийн байр суурийг тодруулах нь үндсэндээ дэлхий нийтэд хэрэглэж, тодорхойлж байгаа хандлагыг харах боломжийг бүрэн олгоно гэж үзсэн. Бодлогын болон судалгааны баримт бичигт агуулгын шинжилгээ хийх аргаар гүйцэтгэлээ. Судалгааны үр дүнгээс харахад дижитал технологийн ахиц дэвшлээр хүн хэрхэн суралцаж байгааг нээж нотолж байгаатай холбоотой заадаг сургадаг арга барилаар бус сурахад сургах, биеэ даан сурч сурах концепцийг баримтлах хандлага руу явж байна. Иймээс насан туршийн боловсрол гэхээс илүү насан туршдаа суралцахуй хэмээх нэр томьёог боловсролын бодлого практикт хэрэгжүүлэх нь зүйтэй гэж үзлээ.