Дотуур байран дахь хүүхэд хөгжил, хамгааллын үйлчилгээний талаар судалсан үр дүнгээс
Abstract
Монгол Улс 1990 онд албан ёсоор хүүхдийн эрхийн конвенцид нэгдэн орсноор олон улсын өмнө Хүүхдийн эрхийг дээдлэх хамгаалах үүргийг албан ёсоор хүлээсэн байдаг. Энэхүү олон улсын эрх зүйн хэм хэмжээний дагуу хүүхэд бүр ямар ч алагчлалгүйгээр хүүхэд хамгааллын тусламж, үйлчилгээ хүртэж, боловсрол, эрүүл мэндийн үйлчилгээнд хамрагдаж, бие хүн болж төлөвших, авьяас чадвараа бүрэн дүүрэн нээн хөгжүүлэх боломжоор хангагдаж, аз жаргал, хайр энэрэл, ойлголцол бүрдсэн орчинд өсөн торниж, өөрсдийн эрхийн талаар мэдлэг мэдээлэлтэй байж, эрхээ эдлэх үйл явцдаа идэвхтэй оролцох боломжоор хангагдах зэрэг нөхцөлийг бүрдүүлэх үүргийг хүлээсэн.
Хүүхдийн эрхийн тухай хуульд зааснаар төр, иргэн, хуулийн этгээд үйл ажиллагаа явуулахдаа хүүхдийн язгуур эрхийг эн тэргүүнд хангахыг эрхэмлэж, хүүхэд эсэн мэнд амьдрах, хөгжих, хамгаалуулах нийгмийн амьдралд оролцох эрхийг тэгш хангах, тэдний нас, бие сэтгэхүйн онцлогт нь тохирсон мэдээ мэдээллээр хангах зэрэг зарчмыг баримтална гэжээ.
Ерөнхий боловсролын сургуулийн суралцагчийн амьдралын орчин болсон дотуур байранд хүүхдийн эрхийг дээдлэн ажиллах, хүүхэд хамгааллын таатай орчин бүрдүүлэх нь төр, олон нийтийн үүрэг болж байна.
Дотуур байранд зохион байгуулдаг хүүхэд хөгжлийн үйл ажиллагаа, үүнд хүүхдүүдийн оролцоо, сургалт хөгжлийн үйл ажиллагаа, бие даасан клуб, зөвлөлийн үйл ажиллагааны талаар хүүхэд, багш, дотуур байрны ажилтнуудаас авсан судалгааны дүнгээс энэхүү өгүүлэлд дурдахыг зорив.
