“БОЛОВСРОЛЫН ҮНДЭС” ХИЧЭЭЛИЙН ХӨТӨЛБӨРИЙН СУДАЛГАА

Abstract

2014 оноос үр дүнд суурилсан хөтөлбөрийн менежментийг баримтлан багш боловсролын стандарт, хөтөлбөрийг шинэчилж, түүнийг хэрэгжүүлэх, боловсронгуй болгох ажлыг гүйцэтгэж байна. Багш бэлтгэх хөтөлбөрийн нэгэн чухал хэсэг нь багш мэргэжлийн багц хичээл юм. Энэхүү багц хичээл нь боловсрол судлал, сэтгэл судлал, мэргэжлийн заах арга зүй, багш мэргэжлийн дадлага гэсэн дөрвөн үндсэн хэсгээс тогтох бөгөөд боловсрол судлалын чиглэлээр оюутнууд “Суралцахуй, багшлахуйн үндэс”, “Сургалтын онол, арга зүй”, “Боловсролын үндэс” хичээлийг заавал судална. Дээрх хичээлүүдийн стандарт, хөтөлбөрийг боловсруулахад олон улсын баримталж буй чиг хандлага болон хичээлийн агуулгыг харьцуулан судлах шаардлага гарсан бөгөөд Япон улсын багш бэлтгэх Их сургуулийн “Боловсролын үндэс”-тэй холбоотой хичээлийн хөтөлбөрт хийсэн харьцуулсан судалгааны үр дүнг энэхүү эрдэм шинжилгээний өгүүлэлд тусгасан болно.

Тус судалгааг 1) багшлах эрх, багшлах эрхийн үнэмлэх авахын тулд зайлшгүй судалсан байх хичээл, кредит 2) багш мэргэжлийн хичээл, түүний агуулга 3) “Боловсролын үндэс”-тэй холбоотой хичээлийн хөтөлбөр, түүний зорилго, агуулга гэсэн хүрээнд сургалтын баримт бичиг судлах, дүн шинжилгээ хийх замаар хэрэгжүүллээ.

Судалгааны зарим үр дүнгээс дурдвал, багшлах эрхийн үнэмлэхтэй болохын тулд оюутнуудын зайлшгүй судлах хичээлд боловсролын үндсэн үзэл баримтлал, түүх, боловсролын нийгэмд үзүүлэх нөлөө, боловсролын тогтолцоо, удирдлагатай холбоотой агуулга багтаж байна. Эдгээр агуулгыг багш бэлтгэх Их сургуулиуд нь “Боловсролын үзэл ба зарчим” (“А” Их сургууль), “Боловсролын үндэс” (“B” Их сургууль), “Боловсролын гол зарчим” (“C” Их сургууль), “Боловсролын суурь ерөнхий онол” (“D” Их сургууль) зэрэг хичээлээр эзэмшүүлдэг байна.