ЭРҮҮЛ МЭНДИЙН 7 ДУГААР АНГИЙН СУРАХ БИЧГИЙН ДААЛГАВАР, ТУРШИЛТ АЖЛЫН БОЛОВСРУУЛАЛТАД ХИЙСЭН ШИНЖИЛГЭЭНИЙ ДҮН

Abstract

ЕБС-ийн 7 дугаар ангийн эрүүл мэндийн сурах бичгийн даалгавар болон туршилт, дадлага ажил нь сурагчдад ямар мэдлэг, чадвар, дадал, арга барил эзэмшүүлэх болон суурь боловсролын биологийн хөтөлбөрийн үнэлгээний зорилт, жинд нийцүүлж хэрхэн боловсруулсан зэрэг асуудлыг тодорхойлж, цаашид сул талыг сайжруулах боломжийг тогтоох зорилгоор судалгааг хийлээ. Судалгаанд хэмжилзүйн болон даалгаварт шинжилгээ хийх онол, арга зүйг хослуулж хэрэглэсэн. Сурах бичгийн даалгавар, туршилт, дадлага ажлыг хэмжихийн тулд шалгуур үзүүлэлт бүхий (хэмжигдэхүүний төрөл, хэмжигдэхүүний утга тооцсон) аргачлалыг боловсруулж судалгаанд хэрэглэж, тодорхой үр дүнгүүдыг гаргаж оюун дүгнэлт хийлээ. Судалгааны хувьсагч нь нь нэрлэсэн хэмжигдэхүүний төрөлд хамаарагдаж байгаа тул даалгаврын төрөл, туршилт болон дадлага ажлын (Frequency – давтамж, Percent -хувь, Valid Percent -хувьсагчийн хувь, Cumulative percent давтамж) тоон үр дүнг SPSS программ ашиглан гүйцэтгэсэн. Эрүүл мэндийн 7 дугаар ангийн сурах бичигт 116 даалгавар боловсруулснаас 23.3 хувийг сэргээн санах үйлийг дэмжсэн; 40.5 хувийг ойлгох үйлийг дэмжсэн; 25 хувийг хэрэг үйлийг дэмжсэн, 13 хувийг олон сонголттой даалгаварууд тус тус эзлэж байна, Танин мэдэхүйн доод эрэмбийн даалгавар түлхүү боловсруулахад анхаарч ажилласан байна. Хэрвээ сул талыг сайжруулахгүй бол задлан шинжлэх, үнэлэх, бүтээх, шинжлэн судлах, асуудал шийдвэрлэх зэрэг суралцагчдын сэтгэхүйн үйлийг хөгжүүлэх чадвар болон арга барил эзэмших боломжийг хязгаарлахаас гадна эрүүл мэндээ хамгаалах, урьдчилан сэргийлэх, бие бялдарын эрүүл мэнд, эрүүл ахуйн зөв дадал хэвшил төлөвшихгүйд хүргэх эрсдэл бий болно.